DIGITAL BRIDGE 2025: ҚАЗАҚСТАН ЖАСАНДЫ ИНТЕЛЛЕКТ ДӘУІРІНДЕ
2025 жылғы 2–4 қазан аралығында Астанада Орталық Еуразиядағы ең ірі халықаралық технологиялық форум – Digital Bridge 2025 өтті.
Форумға 67 мыңнан астам қатысушы, 100 елден келген өкілдер, 1 000-нан астам спикер, 500 стартап және 500 инвестор қатысты.
Биылғы форумның басты тақырыбы – «AI. Humanity. Future» («ЖИ. Адамзат. Болашақ») – жасанды интеллект пен адами капиталдың өзара үйлесімді дамуының жаңа дәуірін бейнелейді.
Технологиялық өзгерістер орбитасындағы Академия
Қазақстан Республикасының Азаматтық авиация академиясы форум жұмысына қатысып, білім беру, технология және инновация саласындағы стратегиялық бағыттарды талқылауға белсенді атсалысты.
Форум болашақтың — цифрлық шешімдерді белсенді енгізіп, білім экономикасы үшін мамандар даярлайтын жоғары оқу орындарының еншісінде екенін көрсетті.
Қазақстанда бұл үрдіске мемлекеттік деңгейде баса назар аударылуда.
2025 жылғы 1 қазанда өткен Жасанды интеллект жөніндегі кеңесте Президент Қасым-Жомарт Тоқаев атап өтті:
«Университеттер қазіргі әлемдік талаптарға сай озық технологияларды жасай алатын жаңа буын инженерлер мен зерттеушілерді дайындауы тиіс».
Бұл ой Азаматтық авиация академиясының стратегиялық бағытымен үндес.
AI-Sana және Азаматтық авиация академиясы
Мемлекеттік AI-Sana бағдарламасын іске асыру аясында Академияда жасанды интеллект технологияларын енгізу бойынша жүйелі жұмыс жүргізілуде.
Аталған жұмыс келесі бағыттарды қамтиды:
- Оқытушыларды даярлау (профессор-оқытушылар құрамының 77 %-ы жасанды интеллект бойынша базалық курстан өтті);
- Студенттерді оқыту: барлық студенттер Coursera платформасында ЖИ курстарынан өтуде (қазан айының соңына дейін қамту деңгейі – 100 %);
- Жаңа пәндер енгізу: «Авиациядағы жасанды интеллект», «Ұшқышсыз ұшу аппараттарына арналған машиналық оқыту», «Әуе қозғалысын басқарудағы ЖИ»;
- Инфрақұрылым құру: AI-Lab зертханасы мен «Авиациядағы ЖИ» студенттік клубы құрылуда, ЖИ-агенттер мен AI-Dashboard аналитикалық жүйесі енгізілуде.
Осылайша, Академия қадам-қадаммен білім берудің цифрлық экожүйесін қалыптастырып келеді. Мұнда жасанды интеллект білім сапасы мен авиация қауіпсіздігін арттырудың тиімді құралына айналуда.
Digital Bridge 2025: жаһандық диалог алаңы
Ұйымдастырушылардың мәліметінше, форум AI, EduTech, Blockchain, IoT, Big Data, AR/VR, E-Commerce, CyberSecurity, GameDev, SpaceTech сияқты негізгі бағыттарды қамтыды.
Спикерлер қатарында Павел Дуров (Telegram), Кай-Фу Ли (01.ai), Омар әл-Олама (БАӘ жасанды интеллект министрі), Пол Ким (Стэнфорд университеті), Прадип Кхосла (Калифорния университеті), Михаил Ломтадзе (Kaspi.kz), Тимур Турлов (Freedom Holding Corp.) және басқа да әлемдік технология көшбасшылары болды.
Форум барысында AI-Sana бағдарламасына ерекше назар аударылып, ол Қазақстанның жоғары білім беру жүйесін интеллектуалды трансформациялаудың негізгі тетігі ретінде танылды.
Болашақ білімі – бүгін
Ғылым және жоғары білім министрі Саясат Нұрбек өз сөзінде AI-Sana бағдарламасы еліміздің барлық университеттерін қамтитынын атап өтті: ЖИ барлық мамандықтар үшін міндетті пәнге айналды, 38 жаңа білім беру бағдарламасы ашылды, ал 440 мыңнан астам студент пен оқытушы базалық сертификаттар алды.
Азаматтық авиация академиясы үшін бұл бағыт ерекше маңызға ие.
Қазіргі заманғы авиация ұшу қауіпсіздігін қамтамасыз етуде, техникалық қызмет көрсетуде және ұшқыштарды оқытуда цифрлық технологиялар мен жасанды интеллектке барған сайын көбірек сүйенеді.
Авиацияның интеллектуалды келешегі
Академияда AI-Sana бағдарламасы аясында жүргізіліп жатқан жұмыс «ақылды университет» моделін қалыптастыруға мүмкіндік беруде.
Мақсатымыз – дәстүрлі кәсіби дайындықты заманауи технологиялардың әлеуетімен үйлестіріп, сандық және интеллектуалды авиацияда сенімді жұмыс істей алатын мамандарды даярлау.
Digital Bridge 2025 форумы Қазақстанның жасанды интеллект дәуіріне нық қадам басқанын көрсетті.
Азаматтық авиация академиясы – осы өзгерістердің бел ортасында. Біз үшін технология – тек құрал емес, болашақ авиацияның тілі мен мәдениеті.