ҚАЗАҚСТАН – ФРАНЦИЯ: АВИАЦИЯЛЫҚ БІЛІМ БЕРУ САЛАСЫНДАҒЫ СТРАТЕГИЯЛЫҚ СЕРІКТЕСТІКТІ ДАМЫТУ
2026 жылғы 4 наурызда Азаматтық авиация академиясында Францияның Алматы қаласындағы Бас консулы Максим Жеренже және Sorbonne-Kazakhstan Institute директоры Анес Бусетпен стратегиялық кездесу өтті.
Кездесу барысында Қазақстан мен Франция арасындағы авиациялық білім беру, ғылым және азаматтық авиация саласына кадрлар даярлау бағытындағы ынтымақтастықты дамыту перспективалары талқыланды. Бұл диалог халықаралық академиялық серіктестікті нығайту және Академияны Орталық Азия елдері үшін авиациялық мамандар даярлайтын өңірлік орталық ретінде дамытуға бағытталған жүйелі жұмыстың жалғасы болды.
Француз делегациясына Академияның инфрақұрылымы – оқу корпустары, мамандандырылған аудиториялар, авиациялық тренажерлік кешендер және салалық зертханалар таныстырылды. Әсіресе мамандарды тәжірибеге бағытталған түрде даярлауға мүмкіндік беретін заманауи авиациялық симуляторлар мен техникалық алаңдар ерекше қызығушылық тудырды.
Сондай-ақ 2024 жылдан бері Азаматтық авиация академиясы мен Францияның Ұлттық азаматтық авиация мектебі (ENAC) арасында қол қойылған ынтымақтастық туралы меморандум аясындағы өзара іс-қимылды дамыту мәселесіне ерекше назар аударылды. Бұл серіктестік бірлескен білім беру бағдарламаларын іске асыруға, академиялық ұтқырлықты дамытуға және қос диплом бағдарламаларын енгізуге мүмкіндік береді.
Білім беру, ғылым және индустрияның тығыз интеграциясы негізінде қалыптасқан француз тәжірибесі, сондай-ақ Airbus, Safran және Thales Group компанияларының қатысуымен дамыған авиациялық экожүйе жаңа буын мамандарын даярлау үшін ерекше маңызға ие.
Тараптар студенттер мен оқытушылардың алмасу бағдарламаларын дамыту, авиациялық технологиялар, цифрландыру және жасанды интеллект салаларында бірлескен ғылыми-зерттеу жобаларын іске асыру мәселелерін де талқылады.
Кездесу қорытындысы бойынша тараптар авиациялық білім беру саласындағы ынтымақтастықты кеңейтуге және ұзақ мерзімді стратегиялық серіктестікті қалыптастыруға өзара қызығушылық білдірді.