АЗАМАТТЫҚ АВИАЦИЯ АКАДЕМИЯСЫНЫҢ ДЕЛЕГАЦИЯСЫ ҰЛТТЫҚ ҒЫЛЫМ АКАДЕМИЯСЫНЫҢ 80 ЖЫЛДЫҚ МЕРЕЙТОЙЫНА ҚАТЫСТЫ
Азаматтық авиация академиясының ректоры Дәулет Әбірбекұлы Мамеков бастаған делегация Қазақстан Республикасы Президентінің жанындағы Қазақстан Республикасының Ұлттық ғылым академиясының 80 жылдық мерейтойына арналған салтанатты іс-шараға қатысты.
Қазақ ғылымының негізін қалаушылардың бірі, көрнекті ғалым әрі академик Қаныш Имантайұлы Сәтбаевтың бастамасымен құрылған Ұлттық ғылым академиясы сексен жыл бойы еліміздегі ғылыми ойдың дамуына, іргелі зерттеулердің қалыптасуына және ғылыми әлеуеттің нығаюына елеулі үлес қосып келеді.
Бүгінде Қазақстанда ғылымды дамыту, ғылыми зерттеулердің нәтижелілігін арттыру және инновациялық шешімдерді қолдау мемлекеттік саясаттың маңызды бағыттарының бірі болып отыр. Мемлекет басшысы Қасым-Жомарт Кемелұлы Тоқаевтың бастамалары мен ғылыми қауымдастықтың жүйелі жұмысы отандық ғылымның жаңа мүмкіндіктеріне жол ашуда.
Азаматтық авиация академиясы да білім беру мен ғылыми зерттеулерді ұштастыра отырып, авиация саласының дамуына үлес қосуды басты міндеттерінің бірі санайды. Әсіресе, заманауи авиациялық технологияларды енгізу, саланың өзекті мәселелерін ғылыми тұрғыдан зерделеу және бәсекеге қабілетті мамандар даярлау бағыттарындағы жұмыстардың маңызы зор.
Ұлттық ғылым академиясының 80 жылдық тарихы – еліміздің ғылыми жетістіктері мен зияткерлік әлеуетінің жарқын көрінісі. Академияның тәжірибесі мен ғылыми дәстүрлері жоғары оқу орындары арасындағы ынтымақтастықты кеңейтуге, зерттеу мәдениетін дамытуға және жас ғалымдардың бастамаларын қолдауға негіз болады.
Азаматтық авиация академиясы отандық ғылымның өркендеуіне бағытталған бастамаларды қолдай отырып, ғылыми ұйымдармен және жоғары оқу орындарымен өзара байланысты нығайтуға, бірлескен жобаларды жүзеге асыруға және авиация саласындағы ғылыми ізденістерді дамытуға мүдделі.
Азаматтық авиация академиясы Ұлттық ғылым академиясын айтулы мерейтойымен құттықтап, академиктерге, ғалымдарға және барша ғылыми қауымдастық өкілдеріне шығармашылық табыс, жаңа ғылыми жаңалықтар мен толағай жетістіктер тілейді!
Еліміздің ғылымы дами берсін, ғылыми жаңалықтар мен озық технологиялар Қазақстанның өркендеуіне және авиация саласының болашағына қызмет етсін!
